La classa d’occitan en dirècte a Ràdio País

La classa d’occitan en dirècte a Ràdio País : Reportatge !

Jean-Noel qu’ei jornalista a Ràdio País. Qu’ei un joen òmi de la pèth blanca, lo pèu negre, qui pòrta ua barba e lunetas. Qu’ei pro joiós, arcuelhiu, destenut, aimable e seriós dens lo tribalh. Que’ns a arcuelhuts lo dijaus 02 de heurèr dens l’estudiò tà participar a un dirècte dab eth, Remèsi e Ives, jornalistas tanben.

Ives qu’interròga en dirècte un responsable sindicau que conta lo drama d’un factor qui ei mort d’un avc dilhèu per causa d’estress e problèmas au tribalh. Puish, qu’escotam ua entrevista de Remèsi que parla dab l’organisator d’ua hèsta peus migrants arcuelhuts a Gelos. Après, qu’a un aute òmi au telefòn, un òmi qu’arcuèlhe migrants dens las montanhas d’Aups, mes qu’ei perseguit per la justicia entà aquò, accusat d’estar complici de har entrar « personas illegaus » suu territòri.

Que’ns disem: lo subjècte deus drèits deus òmis que son hèra abordats en aquera ràdio.
Qu’ei lo torn de Ruth e Ludivina de presentar la recèpta de las mervelhas. òsca a eras! N’ei pas evident de parlar en dirècte.

A la fin, Jean-Noel, Remèsi e Ives, qu’ns parlan deu mestièr e de la formacion occitan-ràdio que’s hè en practicant lo jornalisme e en practicant la lenga, de contunh. B’avèm oblidat de parlar de l’internat, de l’abséncia de nòtas au collègi innovant, de las nombrosas opcions, de la defensa de la lenga occitana … Be’ns cau tornar un aute dia !

Enzo, Oriana, Margòt, Aídan, Ruth e Ludivina.

Pour écouter le podcast de l’émission : http://radiopais.fr/program/72